DHAMIRA ZAANZA KUWAKANA MAASKOFU.

NI kama dhamira zimeanza kuwagusa viongozi wa dini na kuanza kuhimiza kuishi utu wema kadiri yasemavyo maandiko katika vitabu vya dini vikiwemo Bibilia na Msaafu, ambapo kwa nyakati tofauti maaskofu wameanza kuelezea dhamiri zinavyowagusa kutokana na vitendo vinavyo endelea kwenye jamii yetu.

Askofu wa Kanisa Katoliki Jimbo la Ngara, Severin Niwemugizi.

Baadhi ya viongozi wa dini akiwemo Askofu Mkuu Dkt Stephen Munga wa KKKT Jimbo la Kaskazini Mashariki la Tanga pamoja na sasa yule wa Kanisa Katoliki Jimbo la Ngara Severin Niwemugizi wameelezea jinsi wasivyofurahishwa na baadhi ya matendo yanayoendelea kwa sasa hapa nchini.

Pia Baraza la Maaskofu Katoliki nchini (TEC) na Askofu wa Kanisa la Ufufuo na Uzima la Ubungo Dar es Salaam, Josephat Gwajima walishatoa misimamo yao juu ya matendo ya kikatili yaliyoanza kuibuka nchini.

Askofu wa Kanisa Katoliki Jimbo la Ngara, Severin Niwemugizi amesema yuko tayari kuitwa mchochezi endapo kundi la watetezi wa haki za binadamu watachukuliwa kama wachochezi.

Askofu Niwemugiza amesema yeye kama kiongozi wa dini anaongozwa na maadili, haki na ukweli hivyo hajali namna wengine watakavyomchukulia.

Akifungua mkutano wa asasi za kiraia ulio lenga kujadili kuhusu Katiba Mpya leo Jumatano, Askofu Niwemugizi amesema imefika wakati nchi inahitaji kuwa na dira nzuri.

Askofu Mkuu wa KKKT Jimbo la Kaskazini Mashariki la Tanga, Dkt Stehen Munga akiteta jambo na Rais Mstaafu wa awamu ya nne Dkt Jakaya Mrisho Kikwete wakati wa maadhimisho ya Jubilei ya miaka 125 ya Uinjilishaji jiji Tanga July mwaka 2015.

Amesema hakuna mtetezi wa haki za binadamu anayetaka nchi iingie kwenye machafuko kwani wote lengo lao ni kuchochea maendeleo, amani na utulivu.

Askofu Niwemugizi amesema kuanza kutokea kwa matukio ya kuteka watoto, vifo katika mazingira ya kutatanisha na ongezeko la watu wasiojulikana ni ishara mbaya.

"Hizi sio dalili nzuri kwa Taifa lenye afya njema. Ni vielelezo vyenye dira mbaya. Imefika wakati tukae kama Taifa tukubaliane kuwa tunataka dira njema ambayo ni Katiba."

Amesema anatambua jitihada anazofanya Rais John Magufuli katika kupambana na ufisadi na kutaka rasilimali ziwanufaishe wanyonge lakini ni muhimu juhudi hizo zilindwe na Katiba nzuri.

"Rais anafanya mengi mazuri na alipoanza kila mmoja aliona dalili za matumaini lakini juhudi hizo zinaweza zisiwe endelevu kama hakuna ulinzi wa Katiba,”

"Tunahitaji Katiba tena Katiba nzuri ambayo haitaruhusu kuchezewa na yeyote kwa maslahi au matakwa yake binafsi."

Amesema, "Namshauri Rais achunguze kwa makini yatakayozungumzwa kwenye mkutano huu,  ayaone kuwa yana nia njema na ayafanyie kazi.

MWISHO.