RAHA YA MILELE UPE EE BWANA!!!

MWANADAMU aliyezaliwa na mwanamke siku zake za kuishi si nyingi, naye hujaa taabu. Yeye huchanua kama vile ua, kisha hukatwa, wala hakai kamwe.(Ayubu 14:1-2)

 

Bi Rose Athumani wakati wa Uhai wake.

Maneno haya kutoka kwenye maandiko matakatifu kitabu cha Bibilia, si kwamba yaliandikwa kwa madhumuni mengine bali ni kwa ajili binadamu kukumbusha mahusiano yake na muumba wake Mwenye Mungu.

Tuna huzunika na kuomboleza kifo cha mpendwa dada yetu na kwa wengine ni mama, kilichotokea mapema asubuhi ya jana November 09 kwenye hospitali ya Taifa ya Muhimbili baada ya kuugua kwa muda mfupi.

Ni kipindi kigumu kwa waliobaki hususani familia, jamaa, marafiki na pia wafanyakazi wenzake alikokuwa akifanyia kazi. Ni wazi msiba huu umewagusa wengi mno kwani kulingana na kazi yake kama mwandishi wa habari ambapo wengi walimfahamu.

“Ee Mwenyezi-mungu, Bwana wetu, kweli jina lako latukukaduniani kote! (Zaburi 8:1)”

Tunamshukuru Mwenyezi-mungu kwa zawadi ya uhai uliomjalia mpendwa wetu huyu aliyetuacha na kurejea kwa muumba wake Bi Rose Athumani.

Nao waandishi wa habari wa magazeti ya Serekali  yaani TSN ambao ni wenye kuchapisha magazeti ya Dailynews, Habarileo na Sport Leo wamesema mwenzao Bi Rose Athumani ameacha pengo kubwa kwao.

Kaimu Mhariri wa Habari wa gazeti la Dailynews Leornad Mwakalebela ambaye marehemu Bi Rose Athumani alikua akifanya kazi chini ya usimamizi wake amesema,

 “gazeti hilo limepoteza mmoja wa waandishi waliokua wakijituma, mwenye nidhamu na mbunifu”.  

Aliongeza pia kwamba, “alikuwa miongoni mwa waandishi wa habari wenye uwezo na waaminifu niliowahi kufanya nao kazi” alisema Mwakalebela.

Marehemu Bi Rose Athumani alizaliwa Moshi mkoani Kilimanjaro mwaka 1976.

Alipata elimu ya msingi na sekondari nchini Kenya kuanzia mwaka 1988 hadi 1991 na baadae kusomea uhandishi wa Habari kiwango cha taaluma ya digrii ya kwanza jijini Dar na baadae nchini Marekani hadi 2002.

Alifanya kazi kama mwandishi wa Habari kwa iliyokuwa Radio Tanzania (RTD) na baadae kamapuni ya magazeti ya Mwananchi Communication Ltd (MCL) kabla ya kujiunga na TSN kama mwandishi wa Habari wa Dailynews kuanzia mwaka 2010.

Alikuwa ana tabia ya kipekee ya kupendwa na watu, mpole na mwenye haiba ya mwanamke ambao kwa asili wameumbwa na huruma na upendo kwa wengine.

Maombolezo ya msiba huu yapo kwa mjomba wake Paul Mushi huko Mbezi Mpigi Magohe na anatarajiwa kuagwa rasmi siku ya Jumapili na kusafirishwa kwenda Moshi kwa maziko siku ya Jumatatu ijayo.

“RAHA YA MILELE UMPEE EE BWANA; NA MWANGA WA MILELE UMWANGAZIE, APUMZIKE KWA AMANI”