UTUMISHI YATANUA TENA MAKUCHA.

WAZIRI wa Nchi Ofisi ya Rais, Menejimenti ya Utumishi wa Umma na Utawala Bora, Mhe Angela Kariuki (Mb) amewasimamisha kazi maafisa waandamizi wa Halmashauri Wilaya za Kilosa na Gairo mkoani Morogoro kwa uzembe kazini.

WAZIRI wa Nchi Ofisi ya Rais, Menejimenti ya Utumishi wa Umma na Utawala Bora, Mhe Angela Kariuki (Mb) akihoji suala la kiutumishi kwa Kaimu Mkuu wa Idara ya Utawala na Usimamizi Rasilimaliwatu wa Halmashauri ya Wilaya ya Kilosa Bi Suzan Nyanda (hayupo pichani) leo huko Kilosa.

Maofisa hao ni Wakuu wa Idara za Utawala na Rasilimaliwatu, Maafisa Utumishi pamoja na wale wa usimamizi taarifa za utumishi na mifumo ya mishahara (HCMIS).

Wengine ni Maafisa Elimu Sekondari na waweka Hazina wa Halmashauri hizo.

Mhe Kariuki na Katibu Mkuu wake Dkt Lauren Ndumbaro walifanya ziara ya kushtukiza hivi leo katika Halmsahauri hizo baada ya kugundua kwamba maafisa hao hawakusimamia ipasavyo zoezi la uhakiki wa watumishi hewa pamoja na vyeti feki lililo kamilika hivi punde.

Uzembe huo uliodumu  tangu mwaka 2009 na kusababisha kulipwa mishahara ya bure Mwalimu Jasper Ibraim Luchelo wa Shule ya Sekondari Dumila katika Halmashauri ya wilaya ya Kilosa tangu kipindi hicho 2009 hadi Augusti 2017 bila kuwepo kazini.

Aidha Mhe Kariuki amevielekeza vyombo vya dola kumsaka na kumkamata Mwalimu Jasper Ibraim Luchelo ili arejeshe fedha zote alizokuwa akilipwa toka serekalini baada ya kuomba ruhusa ya kwenda masomoni nje ya nchi kwa miaka mitatu tangu 2009 hadi 2012 lakini hakwenda na hajaripoti kazini muda wote huo.

Kaimu Mkuu wa Idara ya Utawala na Usimamizi Rasilimaliwatu wa Halmashauri ya Wilaya ya Kilosa Bi Suzan Nyanda (aliyesimama) akiwasilisha taarifa ya uhakiki wa watumishi hewa na vyeti feki mbele ya  Waziri Kariuki leo huko Kilosa.

Halikadhalika uzembe mwingine ni ule wa taarifa za kiutumishi na mifumo ya mishahara kwa watumishi 97 ambao majina yao mfumo unaonyesha wanalipwa mishahara pande zote mbili za Halmashauri ya Wilaya ya Kilosa na Gairo kwa wakati mmoja bila wenyewe kujua.

Kutokana na mapungufu hayo Mhe Kariuki ameunda timu ya uchunguzi itakayofanya upya tathmini ya zoezi la uhakiki wa watumishi wa Halmashauri hizo na kuwasilisha ripoti yake Ofisi ya Utumishi mapema iwezekanavyo.

Pia Mhe Kariuki ameagiza hata kama wahusika hao waliohusika katika uzembe huo tangu mwaka 2009 na kwa sasa wamehamishiwa sehemu zingine serekalini au Halmashauri zingine ama kuhamia mashirika ya Umma, waitwe kuja kujibu uzembe waliousababisha hadi serekali kupata hasarakiasi hicho.

MWISHO.