PROF ELISANTE AWAFUNDA WATUMISHI WIZARANI.

KATIBU Mkuu Wizara ya Viwanda, Biashara na Uwekezaji Prof. Elisante Ole Gabriel amewaasa watumishi wa Wizara ya Habari, Utamaduni, Sanaa na Michezo kuendelea kufanya kazi kwa bidii, kujituma na ubunifu mkubwa hata kama yeye amehamia wizara nyingine.

Katibu Mkuu Wizara ya Viwanda, Biashara na Uwekezaji Prof. Elisante Ole Gabriel (aliyevaa kaunda) akiwa katika picha ya pamoja na watumishi wa Wizara ya Habari, Utamaduni, Sanaa na Michezo leo mjini Dodoma ambapo awali ndiye alikuwa anaiongoza kabla ya mabadiliko ya safu ya Makatibu Wakuu na Naibu Makatibu Wakuu yaliyofanywa na Rais wa Jamhuri ya Muungano wa Tanzania Mhe. Dkt. John Pombe Magufuli Alhamisi tarehe 26 Oktoba, 2017.

Prof. Elisante ameyasema hayo leo mjini Dodoma alipokuwa akiwaaga watumishi wa wizara hiyo ambapo awali ndiye alikuwa anaiongoza kabla ya mabadiliko ya safu ya Makatibu Wakuu na Naibu Makatibu Wakuu yaliyofanywa na Rais wa Jamhuri ya Muungano wa Tanzania Mhe. Dkt. John Pombe Magufuli hapojana Oktoba 26, 2017.

Prof Elisante amewaambia kwamba “Tunapimwa kwa utendaji kazi hivyo, endelezeni utamaduni wa kuchapa kazi kwa kujituma, kushirikiana, kupendana na kuwajali watumishi wote hasa wa ngazi za chini” alisisitiza Prof. Elisante.

Aidha, amewashukuru watumishi hao kwa ushirikiano waliompatia tangu alipoingia Wizarani hapo Aprili 01, 2012 akiwa Mkurugenzi wa Idara ya Maendeleo ya Vijana, Naibu Katibu Mkuu na baadae Katibu Mkuu wa Wizara hiyo ambapo Idara ya Maendeleo ya Vijana kwa sasa ipo chini ya Ofisi ya Waziri Mkuu.

Nae Kaimu Mkurugenzi wa Maedeleo ya Utamaduni Bi. Lilly Beleko kwa niaba ya watumishi wengine amemhakikishia Prof. Elisante kuwa wataendelea na uchapaji kazi kadiri alivyowaacha na kwa ubunifu mkubwa kusukuma mbele shughuli za Wizara hiyo na taifa kwa ujumla ili kuwaletea wananchi maendeleo kulingana na malengo ya Taifa iliyojiwekea.

Wakati huo huo Mkurugenzi wa Sera na Mipango Petro Lyatuu amesema watamkumbuka Prof. Elisante kwa utendaji wake wa kazi kwa kujali muda, kila mara na alikuwa akiwasisitiza kutumia simu kimkakati kwa kupokea na kujibu simu ambapo kila mara alikuwa akisisitiza “Simu zenu mziweke kimkakati wakati wote”.

Wizara ya Habari, Utamaduni, Sanaa na Michezo sasa inaongozwa na viongozi wapya ambapo Katibu Mkuu wake ni Bi. Suzan Paul Mlawi na Naibu Katibu Mkuu akiwa Nicholaus B. William.

MWISHO.