SITAKI MCHEZO NA MAADILI: PS SUZAN MLAWI

WATUMISHI wa Idara zilizopo chini ya Wizara ya Habari, Utamaduni, Sanaa na Michezo wametakiwa kufanya kazi zao kwa bidii na weledi mkubwa katika kutekeleza wajibu wao kwa umma na wametakiwa kamwe wasikiuke maadili ya utumishi wa Umma.

 

 

PS Suzan Mlawi, Katibu Mkuu Wizara ya Habari, Utamaduni, Sanaa na Michezo.

Nasaha hizo zimetolewa leo mjini Dodoma na Katibu Mkuu wa Wizara hiyo Bi.Suzan Mlawi katika kikao na watumishi wa Wizara ambapo amewahamasisha kufanya kazi kwa bidii ili kufikia malengo ya Serikali ya kuwatumikia wananchi kupitia sekta zilizo chini ya wizara hiyo. 

“Endeleeni kuwa waadilifu na kuzingatia maadili ya utumishi wa umma, ni wajibu wa kila mmoja wetu kufanya kazi kwa kuzingatia sheria, kanuni na taratibu. Sheria zipo ili zitekelezwe” alisisitiza Katibu Mkuu Mlawi.

Aidha, Katibu Mkuu huyo amewataka watumishi hao kushirikiana kwa karibu na viongozi ili kuimarisha umoja utakaoleta maarifa na ufanisi wa matokeo bora ya kiutendaji kwa manufaa ya umma. 

 Naye Naibu Katibu Mkuu wa Wizara hiyo Bw. Nicholaus William amewataka watumishi wote wizarani hapo pamoja Idara zote zilizopo maeneo mengine kuzingatia nidhamu ya kutumia muda vizuri katika kuwatumikia watu na umma kwa ujumla ili kujenga taifa lenye matokeo chanya ya kiutendaji na hivyo kuleta maendeleo katika sekta za Habari, Utamaduni, Sanaa na Michezo kama inavyotarajiwa.

Nae Mkurugenzi wa Idara ya Maendeleo ya Michezo Bw. Yusuph Singo kwa niaba ya watumishi wote amesema kwamba wapo tayari wakati wote kutoa ushirikiano  kwa viongozi wote bila kubagua na kwa kufanya kazi kwa kujituma ili kusukuma mbele gurudumu la maendeleo ya Wizara.

MWISHO.